आज आमलकी एकादशीव्रत, महिमासहित हेर्नुहोस् आजको दिन २०७७ चैत्र १२ गते

श्रीगणेशाय नमः ।। आज विक्रम संवत् २०७७ साल, चैत्र महिनाको १२ गते तदनुसार ईशवीय सन् २०२१ अन्तर्गत मार्च महिनाको २५ तारिख, बिहीवार  हो ।  सृष्टिदेखि हालसम्म १,९५,५८,८५१२१ वर्ष व्यतीत भइसकेका छन् । कलिकालको ५१२१औँ वर्षअन्तर्गत श्री शालिवाहनीय शाके १९४२, तथा नेपाल संवत् ११४१ अन्तर्गत प्रमादी नामको संवत्सर चलिरहेको छ ।

 सूर्य उत्तरायणमा छन् । शिशिर ऋतुअन्तर्गत फाल्गुन शुक्लपक्षको एकादशी  तिथि बिहान ६।७ बजेसम्म रहनेछ । यो महिनाका देवता विष्णु र मासदेवी रमा हुन् । सूर्य मीन राशिमा र बृहस्पति मकर राशिमा रहेका छन् । अश्लेषा  नक्षत्र बेलुका ९।५९ बजेसम्म रहनेछन् । यसैगरी आज  सुकर्म र भद्रा करण रहेका छन् । आज सूर्योदय बिहान ६।६ मा छ भने सूर्यास्त बेलुका ६।१७ बजे हुनेछ । चन्द्रमा आज कर्कट राशिमा रहेका  छन् ।  

आज आमलकी एकादशीव्रत परेको छ । फाल्गुन शुक्लपक्षको एकादशीलाई आमलकी भनिन्छ । आज अमलाको बोटलाई भगवान विष्णु र लक्ष्मीको रूपमा पूजा गरिन्छ । 

यो एकादशी समस्त पाप नाश गर्न समर्थ छ । सय गाई दान गर्नाले जुन फल प्राप्त हुन्छ त्यही फल आमलकी एकादशीको व्रत गर्नाले मिल्दछ ।  यस व्रतमा अमलाको रुखको पूजन गरिन्छ । अमलाकोे उत्पति भगवान श्री विष्णुको मुखबाट भएको हो । यस फलको स्मरणमात्रबाट गाई दान गरे जत्तिकै फल प्राप्त हुन्छ किनिकि अमला भगवान विष्णुको प्रिय फल हो । 

आमलकी एकादशीको व्रतकथा

भारतवर्षमा  एउटा सुन्दर राज्य थियो । मानिसहरूको आपसमा प्रेम भएका कारण नगरमा धर्म र आस्थाको निवास भए झैं प्रतीत हुन्थ्यो । त्यस राज्यमा विशेष रूपले श्री विष्णुको पूजा हुने गर्दथ्यो । राजा र प्रजा सबै मिलेर एकादशी व्रतको घडा स्थापना गरी धूप, दीप, नैवेद्य, आदिद्वारा पूजा गर्दथे । एकपटक एकादशी व्रत गरेको समयमा सबै जना मन्दिरमा जाग्रम बसिरहेका थिए । रात्रिका समयमा एक  शिकारी आयो जो भोको थियो र त्यो लगभग सबै पापको भागी थियो । मन्दिरमा धेरै मानिस भएका कारण शिकारीले खानेकुरा चोर्ने अवसर प्राप्त गर्न सकेन र त्यो रातभर चार्ने आश गर्दै भोकै विताउनु पर्यो । 

प्रातः काल भएपछि सबैजना आफ्नो घर गए र चोर पनि आफ्नो घर गयो । केही समयपछि चोरको कुनै कारणवश मृत्यु भयो ।  त्यस चोरले जानी–नजानी नै आमलकी एकादशीको व्रत गरेको थियो ।  त्यसै कारणले उसलाई पुण्य प्राप्त भयो र त्यसको जन्म एउटा राजाका घरमा भयो ।

 ऊ असाध्यै वीर, धार्मिक, सत्यवादी र विष्णुभक्त थियो । दानादि कार्यमा उसको रुचि थियो । एकपटक त्यो शिकार खेल्न जाँदा  डाकाहरूको चंगुलमा फस्नपुग्यो । डाकाहरूले उसलाई मार्ने उद्देश्यले शस्त्र प्रहार गर्न थाले । यसरी अस्त्र प्रहारबाट आफूमा कुनै असर नपरेको देख्दा उसलाई अचम्म लाग्यो । त्यसै बेला एउटा अदृश्य  शक्ति प्रकट भई ती सम्पूर्ण डाकाहरूलाई मारिदियो । 

राजाले अचम्म मान्दै प्रश्न गरे ।  यसरी मेरो रक्षा गर्नेको हो ? यसको उत्तरमा भविष्यवाणी भयो । तेरो रक्षा श्री विष्णुजीले गर्दै हुनुहुन्छ, यो कृपा तैंले आमलकी एकादशीको व्रत गर्नाले पाएको हो । यस व्रतका प्रभावले मोक्ष पनि प्राप्त हुन्छ, भन्ने भविष्यवाणी भयो । 

अतः हामीले पनि आमलकी एकादशीको व्रत धारण गर्यौ भने यो लोकको भुक्तिका साथै परलोकमा पनि मुक्ति प्राप्त गर्न सक्दछौँ ।